من غير نزيف
جهاد عصمت
أضيف بتاريخ: 2012/01/26
وشك اصفر
زى الف دمعة واقعة من الخريف
زى شمس
طالعة من حضن الجليد
مدهونة زيف
ساح جليدها ع الهرم
واترشق.. سكينة تلمة
في العلم
مزعت كل الجراح
من غير نزيف
وشك اصفر
لون ضفاير عيلة
في لمعة نهار
او عجوزة ضفرت شيبها
بامل.. ويا انتظار
والشريط جه يلم شيبتك
جوا احلام الصغار
الجدايل..
صرخة بتهد الالم
لكن عكازها ضعيف
زى ثاير صفى دمه
في الميدان
كف نعشه خط اسمك
جوه احضان البيان
لما بابك كان مسمكر بالخشب
قال وماله
يللا بينا نموت كمان
والحرامى كان على اعتابك
شريف
زى بدلة عسكرى
على شهر عشرة مفصلة
وقفت معانا في عرسنا
بنت حلال ومأصلة
لكن صفارها كان بيبهت بالدما
وابنك عضامه مكسرة
حتبيعينى كوم زبالة
عالرصيف؟
زى صرخة خطتيها في الدفاتر
كممت كل الخرس
وكل سطر كان مهاجر
والربيع حضّن صراخك
قبل ما يفكر يسافر
مزع الصمت في جليد
من غير نزيف!
