ياحضــرة الجنـرال ماتخافش م الهلفطـة

دا احنــــا اللى بنلاعب الإنس ويا الجان

أساتذة ف الصفقات وُعلما ف السفسطة

واللى عينيك شايفاه ده زوبعة ف فنجان

 

ياحضـــــرة الجنـــــرال انا وانت دافنينــــه

هاتها ف طرف تالت واهو قطمه ولا نحته 

إيه يعنى كــــــام واحد حـــــرمته من عينه

وهـــــوّ إيـــه وداه .. مايفـــــوق لمصـلحته

 

ياحضــرة الجنرال لا تخــــاف ولا تقلق 

وبيك ومن غيرك كانوا برضه حيموتوا

طلقة رصاصك سبب والموت علينا حق

واللى يقـول حقـــى رح نشترى سكـوته 

 

ياحضـــــرة الجنــــرال وفي لنا بوعـودك 

واحنا كمان نوعدك ح نغرقك ف الغزل

كتير عملنـــــاها .. زمان مع جــــدودك 

ودى حيلة متجــــربة ومن قــديم الازل 

 

ياحضـــرة الجنــــرال بكــره ح تتعدل 

بس اوعى كما عادتك تعملها وتبيعنى 

أصل انت ليك أوقــــات تقلب وتستندل

ياما وقفت معــــــاك وألاقيك بتخدعنى 

 

ياحضرة الجنرال سوق الهبل واحْـوِد

إنت تظبطنى وانا ليك ح اكون ضامن

دا شــــعبنا نســـاى وقلبه مش إســـود

بكره تلاقيه طـالع يهتف خـــروج آمن

 

ياحضـــــرة الجنرال وياحضـرة الطمعـــان

زمانكوا ولىّ وجَبَر وماعادش تانى سكوت 

خدو م اللى فــات عِبره واقروه كده بإمعان 

الشعب دا بيعيــا .. لكنه مش بيمـــــــــــوت