الكلماوي محمود مصطفى رقم 2 في مسابقة شاعر من مصر
محمد صادق
أضيف بتاريخ: 2012/01/17
فاز الشاعر الرائع.. الكلماوي "محمود مصطفى" بالمركزالثاني في مسابقة شاعر من مصر، والتي أقامها اتحاد كتاب مصر برعاية المجلس الأعلى للثقافة بدار الأوبرا المصرية...
وكان الاحتفال على شرف وذكرى الكاتب الراحل "خيري شلبي", تكريما له ولأعماله التي ساهمت في الثقافة المصرية وكان لها أثر كبير... رحم الله الكاتب العظيم خيري شلبي...
حضر الاحتفال وزير الثقافة أ.د \ شاكر عبدالحميد و أمين المجلس الأعلى للثقافة أ.د\ كاميليا صبحي ورئيس الاتحاد أ.محمد سلماوي ورئيس المؤتمر الكاتب جمال الغيطاني وأمين عام المؤتمر د. شريف الجيار.
وقد استلم محمود مصطفى شاعرنا جائزته من الوزير.. وهنأه جميع الموجودين,
محمود مصطفى شاب شاعر صاعد وبقوة, مبروك للشاعر اللي مشرفنا في كل حتة محمود مصطفى... والي مزيد من النجاح والتفوق يا شاعر يا جميل وكل الكلماوية فرحانين بيك
كلمات قصيدة "تاء ونون" التي فازت بأحسن ثاني قصيدة في المسابقة...
أكون أو لا أكون:
مابقيتش أكبر مشكلة
خدِت المكان جملة أهم:
نفس الكلام وبتاء مؤنث, توصف الغايب و"وطن"
( تكون أو لا تكون)
فاصل مليء بالإعلانات, هنروح لبعض الممكنات:
"كوافير فلان" هتقص شعرك قَصِّة التحرير,
:تعليق من المتفرجين:
مع إن أيام ما الميدان كان معركة, كانت مراية الناس تجيب الدم قبل ما وش يتميّز ده مين؟!
:تعليق على الكنبة الخشب:
عارف يا أبويا؟
أيام ما كنت تقول لي: يا عار ع البلد, قعدت أسبوع نِفسي أخد دُش لكن وقتي كان مشحون قوي
ومن العرق داب بنطلون في التاني جلدي بينكوي, الصبح في الشارع بنهتف كلنا, بالليل نقف في شارعنا نحرس أهلنا
تعرف كمان؟
أيامها أول مرة أعرف يعني إيه إحنا في شارعنا؟
شارع بتاعنا
عارف بقى في يوم التنحي؟
راجع معايا أخويا طايرين م الفرح
كان الطريق من بيت لبيت من ناس لناس من ضحكة للتانية لصوت زغاريد فرح من غير بِدَل
عرسان كتير عارضين حياتهم كلها جنب المكان جنب الزمان ده للبَدَل
فاكر يابويا اليوم ده جيت لك بسألك:
رديت عليّا وقلت لأ, ده ماكانش عار
الحمد لله سلِّمك, ورجعت شايل لإنتصار
فاكر يابويا أنا قلت إيه؟
كان دوري مش دور البطل, بسند وبس
أما البطل هو اللي داق نار السلاح, هو اللي حط إيديه مابين الشق في الأسفلت جَس
: تعليق أبوه:
فاكر.
: رد الولد:
يابا الشهيد شال روحه على كفُّه
شال البلد بتاريخها على كتفه
ولأنه مات, ده إن إفترضنا إن اللي مات في الحرب مات
أنا ليّا بدل الكف إيد هتكفي روحي, والتانية شايل بيها روحه
ماهو لو ماكانش ساعتها صفَّاه الرصاص وإتشق صدره من الألف للياء, كان لإتفاق فيه حـد فينا يعيش
وماكانش هيقصر في روحي تبات في يوم من غير جسد, مع إني مش عارف له إسم لكنه مايخونِّيش
:من بعد فاصل ممكنات, بنعود لبعض بمعجزات:
المعجزة يا خلق لسة ماستوتش,
ماتحققتش,
لسة القضيـة بتتنظــر, والحلــــم نفسـه بيتنظر
والكلمة تتقال م اللسان وفي ثانية واحدة بتتنكِر
علامـــات قيامــــة دي ولا هيّا الساعــة ذاتها؟!
الشرخ فــي الكوباية بان, فاضل شويـة وتنكسر
وبننتظر!
أنا مـع حياتـــي لسة مـش ناجــح بجـد
أصــل النجــاح فـــدان إزاز مـزروع بــورد
والبذرة لازم تتحضن تتدفى رعشة قلبها
والحضـن قالــب تلــج صيفـه بيبقى برد
لكن أنا, بعـد اللــي شوفتــه بعيني مش فارق, أهون
يعني الكــلام من غير ألف, في الأولى تاء والتانية نون
(وطني تكون أو لا نكون)
