مَحضر جرْد,

يُحصر كل الناس ع الأرض

يتشمّع بالشمع الأحمر..

ورق الورد

جامع مليان ناس بتصلي,

رغم صلاتهم, أجر قليّل,

تفرق ركعة فـ وسط جماعة,

عن نفس الركعة, إنما فرد

فاكر؟

فاكر يوم ما دخلنا الجنة؟

يوم ما لحقنا نقيم الفرض؟

فاكر يوم ما رمينا هدومنا..

وإتكلفتنا بأجساد بعض؟

فاكر شهادتنا, وشهقتنا؟

وأما سمعنا أذان العرض؟

شوفنا إلهنا, بضي قلوبنا

نور بيدفي الروح فـ القبض

دوقنا الدم السايل منا

ف حضن الحَوْضْ

شوفنا السيّد جنب العبد

شوفنا آيات قرآن بعيونّا

بتجسّد تأويل الوعد

كانت نارنا بتطلع منا

تحرق برق, تسكّت رعد

فاكر يوم ما طفينا الشمعة؟

نِمنا ولما صحينا لاقينا..

جثة حد بيشبه لينا

مات فـ بلاد الغربة لواحدة

راجع وسط بضاعة فـ طرد