جـــــرّب
اللى واقف ع البيبان
واللى خايف من دخول المعترك
مش هيدخل
راح يكمل ف الحياة من ع العتب
مهما يحصل مش هيحصل
فينا غير اللى اتكتب
خوفه يبعد أو يقرب
خوفه يفشل لو يجرب
خلى قلبه كيف ماهوّ
نفسه يضمن النتيجة
قبل ما يعيش المواجهة
أصله خايف إنه يخسر
نفسه يسكر
كاسُه متزين قصاده ..واللى مانعه ..
خوفه إنه يبقى شايل
حرمانية و ذنب خمرة
والبطل مرهون بإنه يعيش مغامر
وانت نفسك فى البطولة
وانت مش حمل المغامرة
نفسه يعشق ألف مرة
شرط تبقى نهايته أسعد
من نهايات الحكاوى
عشق من غير قلب يتعب
عيشة خالية من الخساير
واللى عايش صعب يكسب
كل حاجة ف دنيته
عيشها بس بدون ماتحسب
كل حاجة حلوة ..مرة
برضه زايلة
كل حاجة مصيرها فى الآخر تفوت
واللى متردد يعيشها
راح يموت
واللى واقف ع البيبان
مش هيدخل
راح يكمل ف الحياة من ع العتب
واللى خايف من دخول المعترك
لسه كمشان جوه جلده
والحياة شبه الشتا
مستحيل تلمس دفاه
إلا لو حسيت ببرده
