من غير لزوم
أحمد صبري
أضيف بتاريخ: 2011/12/15
من غير لزوم
بنقيس هدوم
مش قدنا
هدوم أشواق
هدوم عشاق
ما تليق لنا
و نحب ناس متلونة
و نحب ناس ولا هم هنا
و نضحك علينا بنفسنا
و نقول لنا دول زينا
مكانهم جوا قلبنا
شوف كام سنة
عدت و أنا
من غير لزوم
بأنام و أقوم
أحلم بيوم
أنسي الهموم
بضحك علي نفسي بإقتدار
و بقول بكرة يتشال الستار
و ليلي يبانله أخيرا نهار
حاجة صعبة مش كده؟
إنك تكون بالشكل ده
إنك تخلص لده و ده
و تلقي السعادة معرضة
عنك كده
متعودة
تزور غيرك ما يستاهلها
و تلقاه قدامك هاملها
يبهدلها
يكعبلها
و هي بتدحرج في التراب
تتعاص هدومها م الهباب
و تبص له ببصة عتاب
و تقوله يا أخي حرام
بقي ده اسمه كلام
غيرك يتمناني ف المنام
و انت تدوسني بالأقدام
يضحك صاحبنا
و يغيظ جنابنا
أصل الحب بالنسبة له لعبة
ينبسط دلوقتي حبة
و بعد شوية تاني حبة
و طز بقي في المحبة
لو جاتله يوم من الأحبة
من غير لزوم
ألقي نفسي ف صالة قدوم
في مطار مهدوم
سقفه الغيوم
أستني فرحي للحظة يدوم
أستني ساعة
مليان قناعة
و ساعة ف ساعة
تمر و أنا واقف ف طاعة
عدي عليا راجل عجوز
قال ليه يا بني ضارب بوز؟
و من المكان ده إيه تعوز؟
قلتله مستني فرحي
يطيب جرحي
و يقلب لصالحي
كفة ميزان مبتتعدلش
مهما أحاول مبتنزلش
قالي يا بني دي أرض بور
علي طريق مهجور
ما قريتش اللي علي السور؟
كان في زيك كتير
من غفير لوزير
كانوا هنا مستنيين
عدت سنين
بشوق و حنين
فيهم واضحين
في بصة عين
و هما لسه مستنيين
عايز تشوفهم يا صبي؟
آه و النبي!
تعالي ورايا من هنا
أصل قبورهم عندنا!
آدي الوزير
و آدي الغفير
مدفون معاهم
حلمهم الكبير
إنفد بجلدك يا بني قوم
نفض أحلامك من الهدوم
شوفلك مركبة و جرب تعوم
في بحر غير بحر الهموم
اللي اسمه حبك يا موهوم
و إياك هنا تاني القدوم
أصل مِجيَّك..من غير لزوم!
