بابا حبيبي.. أكيد حضرتك عارف أنا بحبك وبحترمك أد إيه، وبجد نفسي أرفع راسك وأخليك تفتخر بيا، لكن..في أوقات كتير بحس إن حضرتك واقف في طريق أحلامي....عارفة ومقدّرة خوفك عليا.. بس نفسي تحترم رغباتي وتسيبني أمشي في الطريق اللي رسمته لنفسي.. مش كل شوية زعيق زعيق.. ومش كل مرة أغلط تقول لي مفيش شغل.. ومفيش مجلة.. مع إن حضرتك عارف إن المجلة هي كل حياتي....هي المكان اللي بحس فيه بوجودي... بابا أرجوك افهمني وحس بيا..لو بصيت جواك..هتلاقيني شبهك أكتر حتى من إخواتي.. طالعة لك حتى في العِند..ماما دايمًا تقول لي إنتي مش جايبة العِند من بره..ما إنتي طالعة لأبوكي وأنا ببقى مبسوطة إني شبهك شكلاً وموضوعًا..حتى حبي للكتابة أخدته منك.. فاكر أشعارك يا بابا؟
بابا أرجوك افهمني.. أنا بجد محتاجة تشجيعك ليا..أكتر من أي حاجة.. لأن هو ده اللي هيدفعني أكتر.. وهيشجعني أوصل وأحقق أحلامي.
اخترت إنك تقرأ كلامي ده في المجلة..لأن ده المكان الوحيد اللي بقدر أعبّر فيه عن نفسي.. وزي ما كلامي بيوصل للناس عن طريقها.. حبيت إن كلامي -لأكتر إنسان بحبه في الدنيا- يوصل برضه عن طريقها..وأخيرًا أحب أقول لك إني بحبك مووووووووووت يا أحلى "صلاح" في الدنيا.

  بنتك اللي بتموت فيك
 

نشر فى فبراير 2009