ماما سامية ...اخترنا لك ..سينما الأطفال
والله زماااااان !

فاكر أغنية " يا حلو صبح " لما كنت بتسمعها قبل ما تنزل المدرسة؟، طيب فاكر "سينما الأطفال"، فاكر إعلان "ادي ضهرك للترعة" ...طيب أنا هفكرك !


Quote  : لسه فاكر"سينما الأطفال" اللى كان بيجيب أفلام "كارتون" جميلة قوي ،بس كانوا بيزلونا على ما الفيلم يشتغل!

القديم يحلى

بعشق كل حاجة ليها علاقة بأيام زمان سواء في المدرسة أوالبيت أومع التليفزيون المصري حبيبي !!

 لسة فاكر زمان لما كنت أصحى الصبح عشان المدرسة،وأفتح التليفزيون على برنامج "صباح الخير يا مصر" و ألاقي أغنية " يا حلو صبح يا حلو طل " وماكنتش بحبها، بس بسمعها غصب عني،لأن ماكنش بيجي غيرها،وشوية وتيجي فقرة الفلاح و أغنية "عايزينها تبقى خضرة .. الأرض اللي في الصحرا "،ماكنتش بحبها برده!، بس مافيش حاجة بإيدي وما فيش غير القناة الأولى هى اللي بتكون شغالة في الوقت ده.

وماكنش فيه "دش"، بس ساعات كنت بلمح أغنية "نورالعين" بتاعة "عمرو دياب" و أغنية تانية لـ "محمد محي" مش فاكر اسمها، وكنت ببقى مبسوط قوي بالأغنيتين دول, وده كان شكل برنامج "صباح الخير يا مصر" أيام زمان، اللي دلوقتي بقى حاجة تانية خالص، واتغير فيه كل حاجة حتى فقرة المزارع !

سينما ماما سامية

لسة فاكر كل يوم جمعة الصبح، وبرنامج "سينما الأطفال" اللي كانت بتقدمه "ماما سامية شرابي" واللى كان بيجيب أفلام "كارتون" جميلة قوي للأطفال،بس كانوا بيزلونا على ما الفيلم يشتغل! وكنت بضطر أستنى وأشوف الفيلم،وساعات كان يطلع فيلم رخم مالوش لازمة، بس برضه كانت أيام جميلة بجد.

تيجي بعد كده إعلانات من بتوع زمان " وهتجوز, ونموس عمال يقرص يا أخويا, وإدي ظهرك للترعة"وكل الإعلانات الظريفة دي.

 وبعد كده، يجي وقت الفيلم العربي،بعد ما تقدمه مذيعة الربط بين الفقرات،اللي اختفت دلوقتي،ومعظم الأفلام كانت لـ "إسماعيل ياسين" وكان ممكن الفيلم يجي مرتين في 10 أيام، عادي جداً .

التليفزيون كان بيقفل على الساعة 2 بالليل كده،وكان فيه برنامج في السهرة مشهور قوى اسمه  " يا تليفزيون يا ", برنامج كلاسيكي بس عادي، وماكانش بيبقى فيه غيره ساعتها، كان بيستضيف نجوم، ويتكلم معاهم، وفي الآخر يرسم "رمسيس" المذيع لوحة "كاريكاتير" للضيوف على أغنية صورة بتاعة "عبد الحليم" ويخلص البرنامج، ورغم إنه كان ممل شوية، بس برده ما فيش أجمل من أيام زمان.

برامج أقوى من الزمن

التليفزيون اتغير، لكن لسه فيه برامج بتتذاع بقى لها أكتر من 15 سنة، و أشهرهم " حديث المدينة" اللي ما اتغيرش فيه حاجة من يومها حتى موسيقى "التتر" و أسلوب الإعلامى "مفيد فوزي" والبرنامج ده يعتبر من بقايا التليفزيون القديم، و أنا لسه بشوفه، وبحبه، لإنه بيفكرني بأيام زمان, كمان برنامج " اخترنا لك "، لسه بيتذاع على الهوا، وبنفس موسيقى "التتر" ونفس الفقرات والطرائف!

وأعتقد إن مافيش مذيعة في "ماسبيرو" ما عدتش على البرنامج ده، لإنه يعتبر من علامات التيفزيون القديم، وبقى له عشرين سنة تقريباً، و ساعات بشوفه، والغريب إني لسه بشوف المقاطع اللي كانت بتتذاع من 12 سنة!،ـ  والأغرب إني لسه بفتكرها، أصل أنا بحب أيام زمان قوي.



نشر في كلمتنا يوليو 2008