ارقام سرية .. ده كان إسم الديوان الفائز بالمركز الأول في مسابقة شعر العامية واللي أقامتها الهيئة العامة لقصور الثقافة المركزية لسنة 2008/ 2009 , والصادر عن دار صفصافة
الديوان للشاعر السكندري الشاب/ ميسرة صلاح الدين

وإنت بتقرا الديوان هتلاقي نفسك بتعيش مع الكاتب كتير من أهم لحظات حياته, وبتكتشف إنك عشتها قبل كده, أو ممكن تشوف فيها أجزاء من مستقبلك.

بيتكلم عن الحلم, وعن سن التلاتين اللي بيُعتبر المفصل اللي بينقسم بيه عمر الإنسان على إتنين, بيتكلم كمان عن لحظات الإحباط اللي مافيش حد مننا مامرش بيها, وبيرجع يصالح الدنيا بقصيدة حب واللي بيبدأ كلامها ويقول:
........
كانت شفايفِك نوّه
وعيونك شَبَك
يعنى الليلادي
البحر هيبات عندنا
.......
أما القصيدة اللي بعدها فبيجسد فيها إحساس الإنسان بالوحدة, وبيرمز لفكرته بالمحفظة اللي مافيهاش صور, ومابيقفش عند الحد ده, لكن بيناقش في باقي القصائد أفكار ومشاعر لا تقل أهمية, من الإنتماء, لعلاقة الإنسان بنفسه وبالشيطان, لقصيدة بتوصف إحساس الإنسان بعد الموت, لإحساس الخوف, للإحساس بالذنب, لفكرة إن الواحد أوقات بيكون عايز يقول حاجات كتير لكن ما بيقولش حاجة, ورغم كده بيتمنى إن حد يفهم اللي هو كان نفسه يقوله , وبيختم الديوان بكلمات عنوانها "توقيع".

"الكتاب فعلا عبارة عن مجموعة حروف لا هم لها إلا الوصول بالقارئ إلى أعلى درجات المتعة"