أسامة الشاذلي يكتب: شوية سواد .
هو انت ليه يا ابا، علمتني اضحك، ولما اكشر تقولي في الحزن مش صالحك
وسبتني وحدي، والدنيا زي الغول
اضحك تاكلني، أبكي واقول
هو انت ليه يا ابا علمتني أضحك.
****
هو انت ليه يا ابا خلتني متعنطز، و أهم حاجة الكرامة، ومش مهم أركز
والشغل الايام دي زي زمان العبيد، محتاج تقول وتعيد
وتنسى معنى كرامتك، لاجل ان ما رزقك يزيد
هو انت ليه يا ابا خلتني كده أعجز
****
هو انت ليه يا ابا ربتني وبذمة، والزمن ده يا ابا المجد للرمة
والرمة يترقى ان كان عديم همة، ويوصل قوام للقمة
حسب نقصه في الذمة
هو انت ليه يا ابا مسبتنيش اطلع من ولاد الهرمة
*****
ابويا قال لاجل ان تبيع يا ابني خدها كده قاعدة، تبوس ايدين العدا وتطاطي للبُعدا،
وتحنى جبهتك للذل، والمهم تطعم المعدة
ولاعمرى كنت كده، ولا حتى كان جدك
علشان كده يا ابن ضهري، للزمن جبتك
تكون فارس همام، وتكون من السُعدا
****
وكبرت انا احلم، اتاريني فارس خشب
بيخوض ميت معركة، من غير مايوم يتعب
وانا في عيون الناس لعبة
مسيرى يوم للسوس ... ينهش
اهدى
يا على الرف اتركن، يا اترمي وابقى
صديق التراب، يحن عليه ، يكسيه
ولما افوق انده
اقول موال القمر واغني لابويا غنوته
هو انت ليه يا ابا سبتني لايام صعبة
لينك مدونة اسامة الشاذلي
