صورتك اللى

فوق حيطان اودتى القديمة

لسه موجودة وسليمة

زى اول مرة جيبتها فى التسعينات

لسه بترش الفرح ع الموجودات

وبتبتسم لوشوش صحاب العمر اللى

بيعشقوكى من سنين

صورتك اللى ساكنة بين صور لحليم وسومة

مع بليغ وصلاح جاهين

ياما عاشت ويايا حاجات

شاهدة على كل اللى فات

م المذاكرة للأغانى والكتب

وشايلة ارقام تيلفونات

لسه عنوان الربيع ابو ورد طارح

يا جميلة الروح والملامح

سندريلا سعاد وزوزو

عشتى رمز الحب والحزن النبيل

حلم بمبمى بينتقل من جيل لجيل

ضحكة صافية بتنتطلق تملا الفضا

اد ايه بعدك مضى

وبفتكر زى انهاردة كل عام

يوم ما قاللى الراديو لندن بردها قتل الربيع

قلبى فى ضلوعى انقبض

ولاقيت عنيا بتحضن الصورة فى ذهول

وفضلت اقول

سندريلا عمرها ما تنهى الحكاية

سندريلا بتنتظر الساعة تضرب

تجرى وتروح أوام

سندريلا اى حاجة تانية واردة

اختصرتى الحزن كله فى نظرة واحدة

واختزلتى الفرح كله فى غنوتين

الف رحمة ونور عليكى


وياما ليكى مشتاقين

 

لينك الـ Note

https://www.facebook.com/note.php?note_id=10150219365094590