من حوالي اسبوعين ، دارت بيني و بين زميلتي في الجامعة مناقشة علي موضوع الحمايه الدوليه إلي كان يطالب بها بعض المسيحيين المصريين. طبعا أنا كنت ضد مجرد طرح الموضوع ده. و هي كمان، صحيح لم تكن تعارضه بوضوح و لكن بدت و كأنها بين قرارين أصعب من بعض. فكل ما قالته في الموضوع:
- أنا كمسيحيه ، حاسه إني مضطهده في البلد دي.
********
أنا بتخرج من الجامعه الامريكية - عقبال عندكوا - و من إسبوع كده بدأت تحضير لحفلة التخرج بتاعتي. إشتريت فستان ، و جزمة و طرحة ( و حطوا ألفين خط تحت طرحه دي لو سمحتوا ). كمعظم حفلات التخرج بيكون فيه المراسم المعروفة ، اللي بنستلم فيها شهادتنا و نسمع فيها تلات أو أربع خطابات لناس عمرنا ما شفناهم قبل كدة و نتصور الصورة الشهيرة مع ماما و بابا و أبيه. أما بالنسبة لجزء التاني من يوم التخرج فهو بيكون الأكثر انتظارا لأي طالب، يسمي بال "افتر جراد". و دي بتكون "الحفله" إلي فيها طلبة الدفعه كلها بيحتفلوا مع بعض.

أنا كنت لسة ماقررتش أحضر "آلافتر جراد" مع الجامعة ولا لا، و كان قراري هيكون علي أساس ايه المناسب "ليا". النهاردة سألت علي إمكانية الحصول علي تذكرة ، بس لم أوفق .. ليه ؟؟
- سوري بجد أوي بس أصل .. ممنوع محجبات.
- ممنوع محجبات ؟ ده زي ممنوع الوقوف صف تاني مثلا ؟ ممنوع إستخدام الكلاكس ؟ علي أساس إن أنا ١٢٨ حمرا ؟
- الفندق هو إلي مانع مش إحنا
- الفندق ؟ غريبة .. مع إن أخويا مرة كدة اتجوز و دخلوني أنا و ماما عادي جدا مع المعازيم.
- فيه بار مفتوح. و ده عشانكوا "أنتوا"يعني ..
( إحنا اللي هما القلة المندسة المحجبة طبعا)

الفكره إن مش أول مره أسمع فيها موضوع الحجاب ده. بس أول مره اتمنع دخول حاجة تخصني أنا. حفلة تخرجي أنا. تصحيح ، حفلة تخرجي أنا و أكثر من خمسين بنت - سوري في اللفظ يعني - محجبه. تسائلت في سري ، هل أنا درست علي نفقة الدوله مثلا بينما درس الآخرون علي نفقة أبوهم ؟ هل أنا بتخرج بدرجتين شفقة بينما يتخرج الآخرون بتقدير عالى؟ بلاااش دي . طيب يكونشي أنا مليش نفس مثلا ؟ أو مثلا يكون منظر - لامؤاخذة - الحجاب مقزز أوي كده ؟ طب أهم سؤال بجد .. ليه أنا مضطره طول عمري أستحمل منظر واجدة محشورة في جينس قابل للانفجار و مطلوب مني معلقش و لا أقول إن المنظر ده مثير للقرف في حين إن غيري مش متقبل منظر الحجاب البيئة بتاعي ؟

و الحل ؟ حفلة "خاصة" يعني ماقدرش اعترض في الجامعة لأن الطلبة نظموها "مع نفسهم" و المنظمين لهم الحرية في اختيار "مناظرنا" .. و البحر أهو موجود و أشربوا عشان تنسوا
******
:رجعت و افتكرت حواري مع صديقتي المسيحيه و لقتني بقولها ..
عمرك ماتقبلتيش في شغلانه عشان لابسة صليب كبير ؟ عمرك أخوكي اتقبض عليه عشان بيروح الكنيسة الفجر ؟ أو عشان راسم صليب على إيده ؟ عمرك حبيتي تخرجي مع أصحابك و وانتوا علي الباب منعوكي إنتي لوحدك من الدخول؟ مش بسبب تصرف غير مقبول منك ، لكن بسبب لبسك ؟ عمرك جالك عريس صالونات و رفض يشوفك لما عرف إنك بتلبسي حسب عقيدتك ؟
أنا أواجه كل هذا ..

إذا راودك شعور بالاضطهاد كمسيحية. و تعاملتي و كأنك أقلية في بلدك ، حاسه بيكي! فأنا محجبه. و حاسه إني مضطهده في بلدي.

و أكيد الموضوع مش بتفاهة حفلة لشوية طلبة ، الحفلة دي مجرد تجربة من خلالها شاركت شعوري ، و تظل الحفلة علي الهامش السطحي لما أحاول أن أقول ، و يظل المعني الحقيقي يكمن في المبدأ و الظاهرة نفسها من منع المحجبات في الأماكن العامة و الشواطئ و رفضهم من وظائف و عرسان "هاي كلاس".

أما بالنسبه لمنظمي ال"افترجراد " فكل إلي أقدر أقوله ، علي رأي اللمبي : لأ يا أمه حرفس و أشتغل معاكى.


**( طبعا أنا مش محتاجة أوضح اني من نفسي أقدر أميز المناخ المناسب ليا و لعقيدتي - أياكانت. و لكن دائما يجب أن أكون أنا وحدي من يقرر ذلك. مسألة مبدأ يعني .)

لينك الـ Note

https://www.facebook.com/notes/menna-adli-el-kiey/%D9%85%D8%AD%D8%AC%D8%A8%D8%A9-%D9%8A%D8%B9%D8%B9%D8%B9%D8%B9%D8%B9%D8%B9/10150215688362904