ولماذا نتحدث كما لا يتحدث المصرى الحقيقي 

المصرى اللى بجد اللى نزل و حمى الثورة بجد

على راسى كل النخبه و كل المصريين 

لكن ارجعو بالزمن كام شهر لورا 

من اول اول يوم فى الثورة بليل 

مين اللى بدء يشتبك مع الشرطه اكيد فاكرين الوشوش و مين اللى حرقوا الأقسام ...

مين اللى حمونا من البلطجيه 

و للمره التانيه على راسى النشطاء و المتظاهرون 

بس بجد كان فيه فوسطينا ناس بدأ النشطاء يتكلم عنهم من كام يوم اولاد المناطق الشعبيه اللى كلهم شجاعه و قلب ميت 

الولاد اللى اتكلم عليهم كل الناس 

اللى معظم الناس اللى نامت مرتاحه ايام الثوره نامت مرتاحه لانهم حارسينهم و موجودين وسطهم 

فاكرين ايام ما قالوا بلطجيه 

سورى فالكلمه بس اللى منطقته مكنش فيها صيع مكنش بينام مرتاح 

و انا اسفه انى بقول كده على الناس اللى حامتنا بجد بس ده لفظ من الالفاظ اللى الثوره خلتها وسام على شرف صاحبها 

هما دول اللى حمونا و خوفوا البلطجيه 

كل واحد فينا بينزل كل يوم من بيتهم وزن اقل واحد فينا كده بالتقدير الجزافى 10 الاف جنيه 

بتنزل كل يوم ب 10 الاف جنيه

احسب موبايلاك بكام و لبسك بكام 

و مش بعيد تكون من العيال اياهم و انا منكم يعنى من اللى بنلبس نضارات بتوزن رقم و قدره 

و اذ ربما يكون معاك لاب توب و مش بعيد يكون ربنا فاتحها عليك و عندك لاب فالبيت و بتروح بالميني لاب توب الشغل 

او من اياهم و اللى معظمنا منهم الاى فون او بلاك بيرى 

انا لا بهزر و لا بحقد دلوقتى 

بس بفكرك ان مش احنا اللى حاسين بمصر اللى بتتقطع و بتتهرس 

و بطلوا بقى تقولوا كلنا عدا علينا ايام مكنش فبيوتنا فيه عشر جنيه 

 

كان بمزاجنا و بارادتنا و اختارنا الثوره بحريتنا 

و من غير استفزاز ده كان لان الايه تى ام فالبنوك مش شغاله 

فى ناس بتتهرس فى مصر 

كل يوم بتتهرس اكتر 

لا لاقيين عيش و لا سكر و لا دوا طبعا 

بس لان الناس دى بتشوف الدوا رفاهيه 

لان الجوع كافر و بجد

متقولوش اصل ايام مبارك كانوا بيموتوا من الجوع برده 

و لا تقولوا بكره هايبقى احسن 

لو مش قادرين تعملوا حاجه صح و كويسه اسكتوا 

و كفايه تتكلموا و تفكروا بايدلوجياتكم الموقرة داخل قاعات المؤتمرات المكيفه 

و ابقوا افتكروا الالم الكبير اللى هاتاخدوا تانى و تالت ورابع يوم ما الناس ماتديكوش اصواتهم و يبقى 77% نعم 

و حاشا لله لو بقولكم تتصرفوا عشان الناس تديكم اصواتها 

بس حسوا بالناس بقى عشان تبقوا منهم 

حسوا بالناس مره واحده 

انزلوا المقابر شوفوا الامهات بتحكى على الاكل و الشرب ازاى 

و انتم يا متطوعين ياللى فكل مكان ياللى حاسين بالناس ولامسينهم قبل و بعد الثورة 

انطقوا 

و قولوا للثوره و للثوار و للمجلس العسكرى 

الحقوا المصريين 

حتى اللقمه مبقوش لاقيين 

الرساله دى اقسم بالله و لا مبالغه و لا استعطاف 

انما بجد استغاثه 

لان بجد

مصر اللى فالتلفزيون غير مصر اللى فالشارع 

الاخوه النخبويون بيتخانقوا دستور قبل الانتخابات و انتخابات قبل دستور 

و اصل الليبراليه مامتك هاتمشى من غير حجاب 

و كلام يوجع البطن 

بس احنا بطننا بتتوجع تضامنا 

او تعاطفا 

فى ناس بطنها بتتوجع 

بس من الفضى و الفراغ 

الى المجلس العسكرى الموقر بدل ما تؤمر بصرف سيارات مرور من نوع حديث 

اكل المصريين اللى هايموتوا من الجوع

الى السيد رئيس الوزراء 

من فضلك بدل ما تقترض لسد الديون و رفع المعاشات 

الحق اللى ما بياخدوش معاش اساسا 

 

الى النشطاء والنخبويين 

مصر اللى بجد

بجد هاتموت من الجوع